Ekta danskt kanilbrauð

Haustið er að detta inn hérna hjá okkur í Kaupmannahöfn þó hitastigið hangi enn í tveggja stafa tölu.  Helgin fór því að mestu í að stússast hérna heima. (lesist: Gústi tók til í geymslunni og henti 10 pokum af allskonar óþarfa dóti sem búið er að geyma allt of lengi) Við erum nefnilega enn og aftur að flytja, þó ekki langt. Bara yfir í næstu götu. Ég segi ykkur betur frá því síðar.

Ég ákvað því að nýta sunnudaginn í baka handa okkur smá góðgæti. Svona ekta sunnudagskaffi meðlæti. Ég byrjaði á því að henda í uppáhalds skúffukökuna okkar og skellti svo í ekta danskt kanilbrauð.  Ég kaupi þetta stundum í bakarínu en mig hefur lengi langað að prófa að baka það sjálf.  Þvílíkt og annað eins góðgæti. Þið hreinlega verðið að prófa.

 

Snúðarnir eru penslaðir með bræddu smjöri og staflað upp í litla turna. Ég mæli ekki með því að reyna að stafla þeim upp í einn turn. 🙂  Mynd: bageglad.dk

Snúðunum er svo svo raðað ofan í vel smurt form, látnir hefast í 20 mínútur og að lokum bakaðir í góðar 20 mínútur. Hugmyndin er að maður geti rifið brauðið í sundur.  Mynd: bageglad.dk

Ekta danskt kanilbrauð
(f. 4-6)

Athugið að í dönskum brauðuppskriftum er nánast undantekningarlaust notað pressuger. En það er vel hægt að nota þurrger.  

 Deig
1 dl volg mjólk
50 gr. ger ( einn pakki þurrger)
1 msk sykur
½ tsk salt
1 egg
80 gr mjúkt smjör
300-350 gr. hveiti

Fylling
150 gr. mjúkt smjör
150 gr. púðursykur
3 tsk. kanill

Fyrir baksturinn
20 gr brætt smjör
Smjör í formið

Glassúr
150 gr. flórsykur
1 eggjahvíta

Aðferð

1. Leysið gerið upp í mjólkinni í stórri skál. Blandið því næst sykri, salti og eggi saman við og hrærið vel. Bætið smjöri og hveiti saman við í litlum skömmtum á meðan þið eruð að hnoða. Hnoðið degið þar til það verður slétt og mjúkt. Látið deigið hefast í 30 mínútur.
2. Á meðan deigið er að hefast er gott að hræra saman fyllinguna. Fletjið deigið út í stóran ferhyrning og smyrjið með fyllingunni. Það er alveg óhætt að smyrja vel út í hliðarnar.
3. Rúllið deiginu upp í stóra pylsu og skerið í snúða (þeir mega alveg vera grófir, mínir voru helst til of þunnir). Leggjið snúðana ofan á bökunarpappír, leggið aðra örk af bökunarpappír yfir og fletjið þá út.
4. Penslið snúðana með bræddu smjöri og staflið þeim upp. Leggið snúðana ofan í vel smurt brauðform og látið aftur hefast í 20 mínútur.
5. Bakið brauðið við 190°C í 15-20 mínútur. (Ég bakaði mittt brauð í 18 mínútur og það hefði alveg þolað aðeins lengri tíma) Látið kólna alveg í forminu áður en þið vippið því úr.
6. Hrærið glassúrinn og skreytið ( Ég var mjög rausnarleg á glassúrinn á mínu brauði)

Með þessu drukkum við ískalda mjólk og gott kaffi.

Værsgo!